За безмалку една година од почетокот на постоењето на директната линија за лекарски совети популарно наречена „Ало докторе“, на 15-ти септември 2014-та година, досега се примени вкупно 48.575 повици, од кои изминaтата седмица од 17-ти до 23-ти август се регистрирани 1.114 јавувања, информираа од Министерството за здравство.
Линијата 02/15 123 е достапна секој ден 24 часа, со цел да се овозможи непосредна медицинска консултација во моментот на појава на какви било симптоми на нарушување на здравјето.
Дваесет и двајца доктори се достапни за медицински совет, а јавувањата се од граѓани од сите градови на Македонија. На сите оние лица кои побарале медицински совет споменатата телефонска, линија им била дадена здравствена помош со совет и соодветна симптоматска терапија, се вели во соопштението на министерството.
Јавувањата во последната седмица биле со широк спектар на најразлична симптоматологија , најчесто за кардиоваскуларни и респираторни симптоми, главоболки, стомачен вирус и симптомна болка.
На линијата „Ало докторе!“ често се јавуваат граѓани за совети поврзани со терапијата која редовно ја примаат за хроничните болести и за симптоми поврзани со крвен притисок.