Економскиот раст на Хонгконг во вториот квартал, според официјалните статистички податоци бил поголем од очекуваниот, благодарение на динамичната потрошувачка, што ја наведе Владата да ја зголеми прогнозата за економскиот раст за цела тековна година.
Бруто домашниот производ на оваа поранешна британска колонија, според сезонски прилагодените податоци, порасна за 0,4 проценти во периодот април-јуни во однос на претходниот квартал, кога е зголемен за 0,7 проценти, пренесува Ројтерс.
Според првичната оценка, растот на БДП во првиот квартал изнесувал 0,4 проценти.
Во споредба со вториот квартал од 2014 година, економскиот раст достигнал стапка од 2,4 проценти, додека економистите во просек очекуваа 2,1 проценти, по годишниот раст од 2,8 проценти во првиот квартал.
Во контекст на овие резултати, владата во Хонгконг во иднина смета на економски раст од 2,0 до 3,0 проценти за 2015, наместо од 1,0 до 3,0 проценти како што претходно најавуваше, и покрај забавувањето на извозот и намалувањето на бројот на туристи од кои четири петини доаѓаат од Кина.
„БДП во вториот квартал е зачудувачки добар, но се прашуваме дали потрошувачката на домаќинствата ќе може да го одржи својот раст и позитивно влијание на БДП“, изјави главниот економист на банката на Источна Азија, Пол Танг.
Експертите исто така истакнуваат дека економскиот раст на Хонгконг би можел да претрпи последици од намалувањето на куповната моќ на кинеските туристи поради девалвацијата на јуанот.
