Автомобилите кои се придвижуваат со помош на електрична енергија, драстично ја зголемиле својата популарност во 2015-та година. Истражувањето на сајтот „ev-sales.blogpost.com“ покажува дека за првите 6 месеци од оваа година во светот се продадени 50% повеќе вакви машини во споредба со истиот период во 2014-та година.
Најсериозен раст на продажбата е забележан на најголемиот пазар во светот – кинескиот. Таму резултатот за првото полугодие е за 175% повисок. Во Европа исто зголемувањето е значително – за 78%.
Лидер во продажбата продолжува да е „Nissan Leaf“ (на фотографијата) со 25.068 примероци, што претставува 12% од целиот пазар на електрични возила. Следат „Tesla Model S“ – 21.552 (11%), „Mitsubishi Outlander“ – 17.104 (8%), „BYD Qin“ – 16.477 (8%), „BMW i3“ – 10.554 (5%), „Renault Zoe“ – 8.528 (4%), „Volkswagen e-Golf“ – 7.150 (4%), „Volkswagen Golf GTE“ – 6.604 (3%), „Chevrolet Volt“ – 6.362 (3%), „BAIC E-Series EV“ – 5.803 (3%) и други.
На табелата на држави во кои најдобро се продаваат електрични возила, лидер е Норвешка со 17.000 примероци. Тоа е 23,22% од вкупната продажба на патнички автомобили. Следат Велика Британија со 14.000 (1,01%), Франција – 14.000 (1,19%), Холандија – 12.000 (5,94%), Германија – 10.000 (0,6%) и други.