Учебната 2015/2016 година ќе почне на 1-ви септември, како и во минатите години, одлучила Владата на седница во среда на која била разгледана иницијативата на хотелиерите летниот распуст да се продолжи до 15-ти септември поради слаби резултати во туристичката сезона во мај и во јуни.
Заклучокот го соопшти заменик-министерот за образование и наука Спиро Ристовски кој рече дека тој произлегол од консултации со стручни лица од воспитно-образовниот процес и професори од педагошките факултети.
„Констатиравме дека во овој момент, безмалку триесетина дена до почетокот на новата учебна година, е предоцна да се прават какви било корекции. Го разбираме барањето и иницијативата на дел од туристичките работници, меѓутоа секогаш се водиме од најдобриот интерес на учениците. Учебната година, како и секогаш, ќе почне на 1-ви септември и апелирам до учениците и нивните семејства да си ги реализираат своите подготовки за почеток на наставата“, рече Ристовски.
Владата ги задолжила министерствата за образование и наука и за економија во наредните месеци да направат подлабока анализа, секое од свој аспект, за ефектите од евентуална промена во начинот на организација на учебната година.
