НЛБ Тутунска банка во периодот од 1.1.2015 до 30.6.2015 година работеше согласно усвоената Деловна политика на Банката за 2015 година, прилагодувајќи го тековното работење на економските и пазарните услови во земјата, се вели во соопштението.
Во првата половина од 2015 година, нето каматните приходи пораснале за 17,9% во однос на истиот период од претходната година. Приходите од камати се повисоки за 1,5%, поради повисоки остварени приходи од камата во сегментот население, кои пак се резултат на повисока состојба на кредити при намалени каматни стапки во однос на минатата година, како и поради повисок износ на наплатени камати од сомнителни и спорни побарувања. Расходите по камати се пониски за 23,9% како резултат на намалување на каматните стапки на депозитите и помал износ на обврски по кредити.
Нето приходите од провизии се повисоки за 1,4%. Приходите од провизии се зголемени за 6,6% како резултат на остварен пораст во доменот на картичното работење (зголемен број на картички и зголемен број на трансакции во ПОС мрежата), зголемен обем на тргувања со хартии од вредност за клиенти, зголемени приходи во управувањето со имот на фондовите, како и поради повисоки остварени приходи од водење на трансакциски сметки и лично банкарство.
Расходите за провизии се повисоки за 23,3%, главно поради зголемен обем на работа кај картичното работење (зголемување на бројот и вредноста на трансакциите и зголемена цена на провизија за меѓубанкарско порамнување, провизии за кредитни посредници и зголемени трошоци за работа со готовина).
Останатите некаматни приходи изнесуваат 148.215 илјади МКД и се повисоки за 48,6% во однос на претходната година.
Вкупните приходи од работење изнесуваат 1.777.546 илјади МКД и се повисоки за 15,1%.
Вкупните оперативни трошоци изнесуваат 823.357 илјади МКД и се повисоки за 2,7%.
Во првото полугодие од 2015 година биле издвоени исправки на вредноста на финансиските средства, на нето основа во износ од 333.728 илјади МКД. Издвоените исправки соодветствуваат на структурата и на квалитетот на пласманите на Банката.
Нето добивката на Банката заклучно со 30.6.2015 година изнесува 509.763 илјади МКД и е повисока за 44,3% во однос на истиот период од 2014 година.
Неревидираниот биланс на успех на Банката можете да го погледнете тука: