Американската сојузна агенција за финансирање иградби на куќи (FHFA) им платила на две приватни адвокатски компании повеќе од 373 милиони долари од 2010 година за водење парници против неколку големи банки поради штетите кои им нанеле на најголемите издавачи на хипотекарни кредити Fannie Mae (Federal National Mortgage Association) и Freddie Mac (Federal Home Loan Mortgage Corporation).
Споменатата сума е помала од 2 отсто од вкупно 18,7 милијарди долари кои адвокатските компании успеале да ги соберат преку спогодби и судски пресуди против 16 банки, меѓу кои се и некои од најголемите во САД, како „Bank of America“, „JP Morgan Chase“ и „Deutsche Bank“.
FHFA покренала вкупно 18 тужби поради повеќе од 200 милијарди долари вредните хипотекарни обврзници кои банките им ги продале на Fannie Mae и Freddie Mac, пред финансиската криза од 2008 година, а не предупредиле на сите ризици во врска со тие хартии од вредност. Агенцијата го надгледува работењето на споменатите издавачи на хипотекарни кредити откако во 2008 година при кулминацијата на финансиската криза овие финансиски институции соочени со банкрот ги презема владата.
Портпаролката на FHFA изјави дека ангажирањето на приватните адвокатски компании „Quinn Emanuel“ и „Kasowitz Benson“ била разумна и во однос на трошоците одмерена одлука за да се надоместат загубите на Fannie Mae и Freddie Mac, и истакна дека резултатот е позитивен за даночните обврзници.
Споменатата сума на адвокатските компании им е платена од 2010 година до почетокот на февруари 2015 година. Од тогаш, регулаторот платил и значително повеќе на адвокатски канцеларии, поради судењата на банките „Nomurа“ и „Royal Bank of Scotland“, кои се обвинети дека им дале на Fannie Mae и Freddie Mac погрешни информации при продажбата на обврзници покриени со хипотеки во вредност од 2 милијарди долари. Судот на Менхетен во мај утврди вина на овие банки и наложи да платат 806 милиони долари казна, но „Nomura“ се жалеше на пресудата
