Шведскиот производител на суперaвтомобили „Koenigsegg“ планира да влезе во бизнисот со подостапни спортски возила. Ова го откри шефот на истоимената компанија Кристијан фон Коенигсег пред „Car Throttle“.
Коенигсег не прецизира кога ќе се случи тоа, но беше категоричен дека достапните автомобили нема да се продаваат под брендот „Koenigsegg“. За таа цел ќе биде создаден нов бренд, чие име се уште не е познато.
„Врвните технологии кои се демонстрираат со „Agera RS“, „One:1“ и „Regera“, може да се користат за некое време во поумерени спортски автомобили. Сепак, брендот „Koenigsegg“ ќе остане зачуван само за врвните спортски автомобили“, изјави Кристијан фон Коенигсег.
Тој рече уште дека за достапните модели може да се бара соработка со друг производител на автомобили, но во моментов е премногу рано за било какви детали.
Познато е дека, сепак, „Koenigsegg“ веќе работи на својот прв модел со четири врати. За автомобилот се знае само дека треба да биде претставен во следните 5 години.
