Европската унија го поздрави во понеделникот претпладнето новиот предлог на грчкиот премиер Алексис Ципрас кој во неделата доцна вечерта телефонски им го претставил на челниците на Германија, Франција и претседателот на Европската комисија, Жан-Клод Јункер.
„Предлогот е добра основа за напредок во преговорите“, оценија од преговарачкиот тим на Јункер.
Малку подоцна, пред почетокот на преговорите со грчкиот премиер Алексис Цирпас, претседателот на Европската комисија изјави дека Грција и кредиторите сé уште не постигнале согласност за реформите, но оти ќе сторат што е можно повеќе во таа насока.
„Ние не постигнавме договор, меѓутоа правиме се за да го овозможиме тоа“, рече Жан-Клод Јункер.
Сé уште не се познати деталите од новиот предлог, меѓутоа како добра основа за напредок во преговорите го смета и германскиот функционер Мартин Зелмаер.
По четири месеци натегања, владата на Цирпас покажува подготвеност за отстапки и по маратонскиот состанок понуди нов предлог кој грчкиот премиер им го изнесе на германската канцеларка Ангела Меркел, на францускиот претседател Франсоа Оланд и на Јункер.
Од неговиот кабинет издадоа соопштение во коешто се наведува дека договорот „конечно треба да биде донесен, а не привремено решение“ за грчкото прашање, ненаведувајќи дали предлозите со нови, како што бараа доверителите – Европската унија, Европската централна банка и Меѓународен монетарен фонд, пред решавачкиот самит во еврозоната, којшто ќе се одржи во понеделникот навечер.
