Компанијата „Пакомак“ продолжува со инвестиции низ земјава насочени кон подобрување на комуналната инфраструктура во Македонија. Деновиве на Општина Тетово ѝ беше дониран уште еден камион за собирање отпад, трет за неполни две години, како и донација во износ од 50 отсто за возило за метење улици.
Предходно во оваа општина беа донирани 40-ина контејнери и 100 дводелни канти за селективно собирање пластична амбалажа и друг комунален отпад. Со тоа се подобрува комуналната инфраструктура во градот и се придонесува кон подобра хигиена на улиците.
Донацијата во Тетово ја прими градоначалничката Теута Арифи која се заблагодари за поддршката од „Пакомак“ во справувањето со отпадот и изрази уверување дека со ваква партнерска соработка Тетово набрзо ќе биде град кој одржливо и ефикасно ќе го менаџира својот отпад, вклучувајќи го и отпадот од пакување.
Според Филип Ивановски, претставник на „Пакомак“, Тетово е еден од градовите кој по Скопје, генерира најмногу отпад, а со тоа и отпад од пакување. Истакна и дека „Пакомак“ во Тетово гледа сериозен партнер кој и самиот вложува во управување со сметот и отпадот од пакување.
„Досега дониравме вкупно три камиона, четириесетина контејнери и сто дводелни канти на општината, придонесувајќи Тетово да стане град со сите белези на модерен и урбан град. Очекуваме селектирањето на отпадот да стане навика на тетовчани, а за остварување на таа цел имаме поддршка од градоначалничката Теута Арифи која успешно се фати во костец со горливите проблем на Тетово и има развиено висока свест за екологијата“, рече Ивановски.