Група пратеници денеска во Собранието поднесоа предлог закон за амнестија на лица кои дале неточни изјави за годишните приходи во Фондот за здравствено осигурување.
Законот е иницијатива на Движењето за социјална правда „Ленка“, а го поднесоа пратениците Лилјана Поповска, Павле Трајанов, Роза Топузова-Каревска, Солза Грчева и Љубица Буралиева.
Со законот треба да се реши еден системски проблем во кој се западнати државните институции и една голема група од 15.000 граѓани, поради давање неточни изјави за годишни приходи во 2011-та и 2012-та година. Пресудата е покрената од Јавното обвинителство групно, преку казнен налог и досудена без присуство на обвинетите.
Се работи главно за невработени и граѓани од социјално ранливи категории, кои се неоправдано казнети со три месеца затвор и една година условно, и им е отворено криминално досие. Со оглед на фактот дека тие и во 2013-та и 2014-та година имаат по автоматизам пополнето исти изјави, ќе станат рецидивисти и ќе мора да се спроведе казната затвор поради надминување на приходите за 100 до 1.000 денари.
Целиот случај е полн со нелогичности и преседани, па создава сериозен проблем за граѓаните и за државата, особено што се осудени по член од Закон кој е претходно укинат на Уставен суд, на иницијатива на „Ленка“, сметаат подносителите на прелог законот.