Италијанската економија покажува знаци на закрепнување, но поради кревките економски политики потребно е да продолжи со понатамошното спроведување на амбициозните реформи.
„Економската активност во Италија порасна, иако и понатака заостанува зад просекот на еврозоната во целина“, изјави гувернерот на Италијанската централна банка Инјацио Виско во текот на генералното собрание на италијанската централна банка.
Зголемувањето на извозот и внатрешната побарувачка поттикнува раст на економијата, кој во првиот квартал достигна 0,3 проценти по три години рецесија, пренесува АФП.
Но, активностите на планот иновации се помалку живи отколку во останатите развиени европски држави. Заостанувањето во тој поглед, особено во споредба со Германија, е нагласено во индустриските сектори, додаде гувернерот.