Ансамблот на прилепскиот театар „Војдан Чернодрински“ е прогласен за најдобар ансамбл одигрувајќи ја претставата „Буре барут“ на меѓународниот фестивал на НЕТА кој по петти пат се одржа во Враца, Бугарија. Претставата е од Дејан Дуковски, а е во режија на Наташа Поплавска.
Жирито во состав Нора Макарова од Русија(претседател) и членовите Веселина Гулева од Бугарија и Тодор Кузманов и Гоце Ристески од Македонија сметале дека претставата „Буре барут“ ансамблот на 26 издание на фестивалот на камерна сцена во Враца ја одиграл маестрално и токму затоа му ја доделиле наградата за најдобар ансамбл.
„Наградата на театарот „Војдан Чернодрински“ му се додели заради високото професионално ниво на актерската игра, која се одликува со сугестивност и ентузијазам, заради што истата прераснува и се доживува како актерска симултанка, која од претставата прави жив и пулсирачки сценски чин“ вели членот на жирито, театарологот Тодор Кузманов.
Ова е второ меѓународно признание за претставата „Буре барут“ и за ансамблот. Минатата година на актерката Даниела Иваноска и беше доделена наградата за споредна женска улога на фестивалот на актери во Никшиќ, каде исто така настапот на овој театар беше одлично оценет.
Инаку, речиси целиот ансамбл на театарот деновиве е вклучен во интензивните подготовки на претставата „Премиера во сабота“ по текст и во режија на Коле Ангеловски, која премиерно ќе биде изведена во првата половина на јуни.