Можностите за финансирање на приватниот сектор преку Програмата на Европската унија „Хоризонт 2020“ беа презентирани во петокот во Кичево од страна на Стопанската комора на Македонија.
Презентацијата е во рамките на Проектот „Формирање бизнис-центар за поддршка и консултативни услуги за малите и средни претпријатија во Југозападниот плански регион“.
Претседателот на Регионалната комора со седиште во Кичево, Игор Соколоски, истакна дека со подетално запознавање на бизнис-заедницата со достапните можности за финансирање и учество на приватниот сектор со апликации и со реализација на проектни активности се очекува зголемување на инвестициите, што ќе овозможи креирање на нови работни места и задоволување на интересите на бизнис-заедницата.
Раководителот на Центарот за развој на Југозападниот плански регион, Мирјана Лозаноска изјави дека главна цел на Проектот е да се зголеми конкурентноста на планските региони преку поддршка на малите и средните претпријатија и на претприемништвото во регионот, исто така со зголемување на пристапот до информации во носење на соодветни одлуки на локално и на регионално ниво.
Посеебен акцент на презентацијата беше ставен на МСП-инструментот, каде може да се аплицира во три фази, а кој е достапен и за микро компании на кои им се достапни финансиски средства во првата фаза во износ до 50, во втората фаза од 500 илјади до 2,5 милиони евра и во третата фаза консултантски услуги.
На настанот присуствуваа фирми од сите дејности кои се заинтересирани и веќе искажаа интерес за аплицирање за европските програми.