Цената на сировата нафта се стабилизираше на светските берзи близу 66 долари благодарение на податокот за силниот кинески увоз кој го сопре притисокот од јакнењето на доларот и шпекулациите за можно зголемување на американското производство.
На лондонската берза цената на барелот незначително падна во однос на претходното затворање, на 65,44 долари. На американската берза со барелот се тргува по речиси непроменета цена во однос на вчерашното затворање од 58,86 долари.
Цените во четвртокот го завршија тргувањето во минус 4,4 отсто под влијание на силното јакнење на доларот кој беше поттикнат од продолжениот тренд на подобрување на состојбата на америкаскиот пазар на труд. Во текот на денот владата ќе ги објави официјалните податоци за вработувањето во април.
Освен јакнењето на доларот, пазарите ги погодија и шпекулациите дека американските производители повторно ќе го зголемат производството доколку цените на нафтата продолжат да растат.
„Благото намалување на американското производсто во изминатите недели сигурно не го оправдува зголемувањето на цените за 30 до 40 отсто од јануари“, напоменува Ханс ван Клиф од холандски ABN AMRO. „Нафтените пазари сеуште се раководат од состојбата на страната на понудата, која е преголема“, потсетува ван Клиф.
Берзите во текот на денот ги стабилизираа охрабрувачки азиски податоци за побарувачката. Кина во април увезла 30,29 тони сирова нафта, што е за 13 отсто повеќе во однос на претходниот месец.
Дополнителна поддршка на цените на нафтата им пружи растот на финансиските пазари по изненадувачката изборна победа на британските конзервативци на парламентарните избори.
