6 мај, 2024
ПочетнаКУЛТУРАБитола дел од глобалната прослава на меѓународниот ден на џезот

Битола дел од глобалната прослава на меѓународниот ден на џезот

dzes bitola

Меѓународниот ден на џезот 30-ти април, годинава во Битола ќе биде одбележан со концерт на Мицанов, Поповски, Јосифовски и Стевковски квартет. Настанот е во организација на УНЕСКО младински клуб на МКЦ – Битола во соработка со Порта Џез, со што Битола по третпат се вклучува во оваа глобална акција.

„Овој настан е дел од глобалната акција за прослава на Меѓународниот ден на џезот кој вклучува настапи и концерти во преку 100 земји во светот. Овој ден ги сплотува нациите и општествата прославувајќи ја уметноста на џезот, потенцирајќи ја неговата важна улога во охрабрувањето на дијалогот меѓу културите и цивилизациите, промовирајќи го човековото достоинство. Поради овие вредности УНЕСКО го поттикнува и охрабрува одбележувањето на овој ден“, рече во на прес-конференцијата во пресрет на настанот, Сашо Додовски, директор на МКЦ Битола.

Концертниот настан ќе се одржи во четврток 30-ти април во кафе барот „Порта Џез“ во Битола, со почеток во 21.30 часот, а влезот е слободен за сите љубители на добрата музика.

Бендот, на настапот во Битола, ќе изведе неколку авторски џез композиции на Мицанов и на Поповски како и модерни џез стандарди, со што публиката ќе има можност да проследи една концертна промоција во живо на она што се нарекува модерна тенденција во современиот џез (contemporary jazz).

„На овој меѓународен на џезот во Битола ќе настапиме во формација квартет заедно со легендата на македонската џез сцена саксофонистот Гоце Мицанов, контрабасистот Оливер Јосифовски и Гоце Стефковски. Во САД, април е месец на џез музиката, додека на 30-ти април е финалната прослава. Настанот во Битола во организација на МКЦ е за поздравување и се надевам дека ќе возобновиме еден пионерски проект во Битола за организирање на џез фестивал тој да продолжи и во иднина, бидејќи Битола заслужува да има џез фестивал“, рече Сашо Поповски, магистар по поп и џез гитара, професор на Универзитетот Гоце Делчев – Штип по историја на џезот, кој има настапувано на преку дваесетина фестивали во земјата и странство и активно работи на пренесување на знаење и преку неформално образование на младите за џез музиката во програмите „Џез фабрика“.

Инаку, Гоце Мицанов е легендарен саксофонист со извонредно богата музичка кариера. Меѓу другото бил долгогодишен член на најпознатиот македонски бенд Леб и Сол, во групата Парамециум и како член на Биг Бендот на МРТ. Тој е можеби единствениот македонски музичар кој има настапувано заедно со светската музичка и џез легенда Реј Чарлс.

Дел од бендот ќе бидат и Оливер Јосифовски – контрабас инаку познат и како лидер на македонската група Љубојна и Гоце Стевковски – тапани кој неодамна го промовираше неговиот прв самостоен албум „7 приказни“, а бил дел и од многу наши познати бендови како Бодан Арсовски Езгија Бенд, Архангел, Леб и сол, Проект Жлуст, ДНО и други бројни џез проекти.

НАЈНОВИ ВЕСТИ

ХОРОСКОП