Google ќе вложи 150 милиони евра во унапредувањето на односите со европските медиумски куќи и веќе наидува на позитивни реакции, објави во вторникот оваа американска мултинационална технолошка компанија.
Парите до медиумите ќе бидат дистрибуирани во текот на следните три години и ќе бидат наменети за промоција на дигиталното новинарство. Осум медиумски куќи засега се вклучени во проектот, и тоа германските весници Frankfurter Allgemeine Zeitung и Die Zeit, британските The Guardian и Financial Times, шпанскиот El Pais, францускиот Les Echo, италијанскиот La Stampa и холандската мрежа NRC.
Во Google планираат и основање на работна група „Digital News Initiative“ преку којашто директно ќе разговараат со претставниците на медиуми. Нивните размислувања би можело да доведат до тоа Google да ги промени сопствените производи, како на пример порталот Google News.
Иницијативата е отворена и за други медиуми и секој од нив може да се пријави за користење на парите од фондацијата за иновации на Google, вклучително и за порталите и старт-ап медиумски компании.
На оваа објава ѝ претходеа меѓусебни обвинувања и критики меѓу Google и европските медиуми. Во неколку земји се разгореа за начините на коишто Google објавува содржини од другите медиуми на својот Google News и на својот пребарувач. Многу медиуми, особено во Германија, бараа Google да им плати за тоа што објавува делови од нивните содржини.
