НЛБ Тутунска банка АД Скопје денеска соопшти дека заокружила уште една во низата успешни години, со остварена нето добивка од 10,9 милиони евра и билансна сума од над една милијарда евра.
Резултатите од работењето на банката беа објавени на Годишното акционерско собрание, кое се одржа на 28-ми април 2015-та година, при што е констатирано дека НЛБ Тутунска банка ја оствари една од најуспешните деловни години.
Нето добивката на Банката за 2014-та година изнесува 10,9 милиони евра, повратот на капиталот РОЕ е 10,8%, билансната сума е 1.055 милиони евра, додека нивото на нефункционални пласмани се задржа на 8,1%, со што Банката повторно оствари подобри резултати од просекот на македонскиот банкарски сектор, и традиционално веќе 29 години, според сите параметри на ликвидност, солвентност и профитабилност се издвојува како една од најуспешните и најстабилните банки во Македонија, стои во соопштението.
На Собранието на акционерите, беше одлучено 70% од остварена добивка од 2014-та година или 7,7 милиони евра да се исплати како дивиденда за акционерите, или 9 евра по акција што е највисока објавена дивиденда годинава меѓу компаниите кои котираат на Берзата. Останатите 30% или 3,2 милиони евра ќе се задржат за инвестиции во основни средства, што ќе овозможи понатамошен развој и проширување на традиционалните и електронските продажни канали, раст на кредитните активности, висока ликвидност и висока адекватност на капиталот.
На Собранието на акционерите беше усвоена и Деловната политика на Банката за 2015-та година, како и Стратегијата за следниот петгодишен период, која е продажно ориентирана и предвидува зголемување на постојното кредитно портфолио, со посебен акцент на кредитирање на микро, малите и средни претпријатија и населението, полесна достапност до услугите и нови функционалности на платните системи, се вели во соопштението.