Министерот за економија Беким Незири денес во Скопје ќе ја отвори првата регионална конференција за вински туризам – Македонија 2015, во организација на Министерството за економија и Тиквешкиот вински пат.
На конференцијата ќе присуствуваат 100-тина претставници од надлежните институции за туризмот во Македонија, Србија, Словенија, Албанија, Хрватска, Црна Гора, Италија, Франција, Португалија, Шпанија, Косово, Босна и др., претставници од коморите, образовните институции и туристичките и винските здруженија, како и професионалци од туристичкиот и винарскиот сектор, невладини организации и заинтересирани страни од приватниот сектор од балканските земји и ЕУ.
Целта на конференцијата е да отвори дискусија за градење на ново партнерство меѓу туристичкиот и винарскиот сектор, преку заедничка соработка, која ќе придонесе кон создавање на конкурентни туристички производи, намалување на трошоците за нивна промоција на трети пазари, а со тоа и сеопфатен економски раст.
