Друштвото за издавачка дејност „Македоника“ од Скопје, неодамна ја објави книгата со афоризми „Цветен пазар“ на македонскиот афористичар Атанас Крлевски.
Книгата содржи близу четиристотини афоризми посветени на жената, а поделени во два циклуса: „Една жена – цвет, две жени – букет, три жени – цветен пазар!“ и „ Бракот е последната глупост на ергенлакот“, а на крајот се објавени осврти за афоризмите на Крлевски од Ана Витанова Рингачева, Душко Кралевски и Сашо Бетоски.
„Жената, љубовта и бракот се трите жаришта врз кои тлеат и искрат афоризмите на Крлевски. Во творечкиот опит на Крлевски трите жаришта се само три распрснати искри од еден пламен. И во претходните свои книжевни остварувања, авторот не ја заобиколуваше жената, напротив таа беше неодминлива инспирација за препознатливите крлевизми, единствени, оригинални и умерени. Луцидно, со внимателно одбрани зборови, жената се внесува како метафора, но истовреме¬но таа е и муза на творечкото око на авторот: Постојат жени што лесно се сакаат, но до нив тешко се стигнува“, пишува Витанова Рингачева во поговорот.
„Крлук“ е четврта книга со афоризми на Атанас Крлевски. Претходно ги објавил „Крлевизми“, „Окрлавени мисли“ и „Крлук“. Атанас Крлевски (1956 година – Ташкент, Узбекистан, живее и работи во Велес) афоризми пишува три и пол децении, автор е на многу антологиски афоризми, наградуван е во земјата и во странство и е застапуван во меѓународни антологии. Објавувал во „Остен“, „Студентски збор“, „Млад борец“, „Македонски остен“, а денес соработува во повеќе печатени и електронски сатирични списанија и портали во земјата и во странство. Меѓу другото, застапен е во неколку антологии со афоризми објавени во земјата и во странство. Член е на балканското здружение на афористичари. Добитник е на неколку награди за афоризми.
