Новиот „Mercedes-Benz C-Class“ е победник на годишниот избор за „Светски автомобил на годината“. Резултатите од гласањето на жирито, кое опфаќа 75 новинари од 22 држави, беа прогласени за време на автосаемот во Њујорк.
Во борбата за првото место „C-Class“ успеа да ги престигне другите два кандидати – „Volkswagen Passat“ и „Ford Mustang“. Моделот на „Mercedes-Benz“ триумфираше благодарение на новата конструкција од алуминиум и челик, големиот избор на погонски агрегати, вклучувајќи и хибриден, како и поради удобноста, безбедноста и користените нови технологии, покажуваат информациите.
Претходни победници во изборот за „Светски автомобил на годината“ беа: „Audi A3“ (2014), „VW Golf“ (2013), „VW Up!“ (2012), „Nissan Leaf“ (2011), „VW Polo“ (2010), „VW Golf“ (2009), „Mazda2“ (2008), „Lexus LS460“ (2007), „BMW Serieѕ 3“ (2006) и „Audi A6“ (2005).
Жирито додели награди и во уште 4 категории.
За „Најлуксузен автомобил на годината“ беше избран „Mercedes-Benz S-Class“, а зад него беа хибридниот спортски автомобил „BMW i8“ и теренецот „Range Rover Autobiography Black“ со продолжена база.
Признанието за „Спортски автомобил на годината“ исто така отиде кај претставникот на „Mercedes-Benz“. Тоа е новиот „AMG GT“ кој дебитираше минатата година. Наследникот на „SLS AMG“ беше подобар од „BMW M3/M4“ и „Jaguar F-Type R“.
Кај номинираните за „Дизајн на годината“ титулата ја освои „Citroen C4 Cactus“, кој се бореше со „Mercedes-Benz C-Class“ и со новата генерација на теренецот „Volvo XC90“. Жирито на натпреварот истакна дека претставник на француската марка се бори за трофејот за шестти пат во последните 10 години.
И конечно – за „Најдобар зелен автомобил“ беше избран моделот „BMW i8“ кој за ривали ги имаше хибридите „Mercedes-Benz S500 Plug-in Hybrid“ и „Volkswagen Golf GTE“.
