Министерот за надворешни работи Никола Попоски и министерот за транспорт и врски Миле Јанакиески денес учествуваа на министерската конференција на западен Балкан „Подобра поврзаност, силна и клучна транспортна мрежа“ во Приштина.
На конференцијата присуствувашe и комесарот за соседска политика и преговори за проширување Јоханес Хан, a се обрати и комесарката за транспорт Виолета Булц.
Состанокот се организира како дел од Берлинскиот процес, а во пресрет на состаноците во Рига и Виена, во мај и јуни оваа година.
На конференцијата се остварија дискусии во однос на предложената методологија на Европската комисија за определување на приоритетни транспортни коридори и се разменија мислења за предлозите за усогласување на клучната транспортна мрежа во земјите од западен Балкан.
Поврзувањетo на земјите од регионот ќе доведе до зголемување на инвестициите, но и зајакнување на врските меѓу луѓето преку границитe и рушење на предрасудите.
„Бидејќи ЕУ е политичка унија, треба да се применат политички критериуми за поврзувањето на регионот. Инфраструктурата не служи само за транспорт на стоки и луѓе, туку и за интегрирање на Балканот во европскиот проект”, потенцираше Попоски.
На овој состанок е договорено следниот состанок во регионален формат да биде одржан во Македонија, а дотогаш ќе биде потребно да се договорат клучните проекти, велат од МНР.