Американската корпорација „Yahoo“ одлучи да го затвори своето претставништво во Кина во рамките на програмата за консолидација и намалување на трошоците.
Во соопштението на „Yahoo“ се наведува дека ќе бидат угасени околу 350 работни места.
„Yahoo“ во 2005 година ги продаде сите свои оперативни потенцијали на компанијата „Alibaba“, а од тогаш го контролира само истражувачкиот центар во Пекинг.
„Постојано правиме промени за да оствариме подобра соработка и иновации во нашата работа“, се додава во соопштението.
„Yahoo“ со месеци се обидуваше да одржи раст на профитот, откако глобалниот примат во сферата на интернет пребарувањето го презема „Google“.