Првиот сериски теренец со алтернативен погон на „BMW“ ќе се појави на пазарот оваа есен. Моделот го носи името „X5 xDrive40e“ и располага со хибриден „plug-in“ мотор, објави германската компанија со седиште во Минхен.
Серискиот „X5 xDrive40e“ ја претставува еволуцијата на концептот „X5 eDrive“ прикажан во Франкфурт во 2013-та година. Моделот е управувано од хибриден мотор, кој има можност за полнење од електричната мрежа (plug-in). Тој се состои од четирицилиндарски бензински би-турбо мотор со зафатнина од 2,0 литри и електромотор кои генерираат 245 и 113 КС. Трансмисијата е автоматска „Steptronic“ со 8 степени.
Вкупната моќност на системот достигнува импресивни 313 КС, а вртежниот момент е 450 Nm. Просечната потрошувачка на гориво е од 3,3 до 3,4 литри, а емисијата на „CO2“ е од 77 до 78 г/км, се наведува во информацијата од „BMW“.
При движење во хибриден режим „X5 xDrive40e“ е способен за забрзување од место до 100 км/час за 6,8 секунди, а може да развива максимални 210 км/час. Во целосно електричен режим, автономијата е околу 31 километри, а максималната брзина е ограничена до 120 км/час.
Полнењето на батериите на возилото може да биде спроведено како со обичен контакт на електричната мрежа, така и со „BMW i Wallbox“ или јавна станица за полнење. Литиум-јонската батерија (9,0 kWh) е монтиран под подот на багажникот, благодарение на што товарниот волумен на автомобилот нуди помеѓу 500 до 1720 литри.
„BMW X5 xDrive40e“ е опремен со системот за погон на четири тркала „xDrive“, како и со познатите режими „COMFORT“, „SPORT“ и „ECO PRO“.
Хибридниот „BMW X5“ ќе се појави пред публиката оваа есен на автосаемот во Франкфурт. Продажбата ќе стартува веднаш потоа, па се очекува тогаш да бидат познати и цените на овој модел.