Индиската компанија „Tata“, стана популарна по малиот автомобил „Nano“, но овој пат ја демонстрира својата нова насока на развој. Под рефлекторите на саемот во Женева компанијата покажа моделот „Hexa“, кој е наменет за светските пазари, вклучувајќи ја и Европа.
„Tata Hexa“ засега е концепт, но од индиската компанија истакнаа дека серискиот модел ќе биде речиси идентичен. За разлика од претходните модели на овој бренд, новиот кросовер демонстрира оригинални и стилски форми, а дизајнот е сличен на европските и јапонските конкуренти.
Моделот е базиран на „Tata Aria“ и нуди 6 места, распоредени во конфигурација 2+2+2. Димензиите на „Hexa“ се 4764 мм должина, 1895 мм ширина и 1780 мм висина. Меѓуоскиното растојание достигнува 2850 мм.
За време на премиерата од индиската компанија, која е сопственик на „Jaguar Land Rover“, изјавија дека концептот „Hexa“ не само што го презентира новиот дизајнерски јазик на „Tata“, туку и ги најавува двата идни модели – „SUV“ и пикап. Во моментов, сепак не е јасно кога ќе ги видиме на пазарот.
Концептот е опремен со 2.2-литарски дизел мотор со четири цилиндри кој генерира моќност од 156 КС и 400 Nm максимален вртежен момент, достапен меѓу 1700 и 2700 врт/мин. Агрегатот може да биде опремено со систем 4х4.
