Сингапур ја задржа позицијата за најскап град во светот, а како и на минатогодишната листа го следат Париз, Осло, Цирих и Сиднеј, објави истражувачката агенција „Economist Intelligence Unit (EIU)“.
Истражувањето опфати 133 градови ширум светот, а како основа за истражувањето бил земен Њујорк, додека споредби на трошоците се вршени за 160 услуги и производи, вклучувајќи храна, облека, сметки.
Во областа на основни животни намирници Сингапур е за 11 проценти поскап од Њујорк, а заедно со Сеул се најскапите места за купување на облека во светот, со цени кои се за дури 50 проценти повисоки од цените во Њујорк, наведува „EIU“.
Сингапур има и високи цени на автомобилите, а трошоците за превоз се речиси три пати повисоки отколку во Њујорк, пренесуваат агенциите.
Податоците собрани во ова истражување се наменети за пресметување на трошоците за живот за оние кои сакаат да го променат местото на живеење, како и за деловните патници.
„EIB“ објави податоци и за најевтините градoви, при што на првото место се најде Карачи (Пакистан), потоa индискиот град Бангалор, венецуелската престолнија Каракас и индиските градови Мумбаи и Ченај.