Централната банка на Турција ја намали клучната каматна стапка за 25 базични поени по повеќемесечните притисоци од страна на претседателот на Турција, Реџеп Таип Ердоган.
Ердоган, имено, се залага за агресивно намалување на каматните стапки со цел поттикнување на економскиот раст.
Банката, по најновиот состанок на монетарниот одбор, соопшти дека еднонеделната репо стапка е намалена на 7,5 од 7,75 проценти, пренесува агенцијата Франс прес.
Маргиналната каматна стапка е намалена за 50 базични поени, на 11,25 од 11,75 проценти, додава банката.
Останува да се види дали овој внимателен потег на банката ќе биде доволен за Ердоган, кој оваа независна институција ја обвини дека ја „влече Турција кон дното“ во коментарите кои значително влијаеа на падот на вредноста на турската валута, наведува Франс прес.
