Во рамки на промотивната турнеја по повод новиот албум насловен „Phantom Radio“, во среда, во МКЦ, за прв пат гостува големиот Марк Ланеган со неговиот бенд.
Марк Ланеган има 50 години. Штотуку го објави својот нов албум насловен Phantom Radio. Тоа е неговиот деветти соло-албум, но ако ги сметаме соработките со Изобел Кембел (Isobel Campbell), Дјук Гарвуд (Duke Garwood) или со едната половина од The Gutter Twins (неговото тековно партнерство со Грег Дули (Greg Dulli)), или пак неговиот поранешен легендарен прв бенд Screaming Trees, тогаш таа бројка се движи некаде околу 20. Потоа тука се и неговите гостувања на албумите на Queens Of The Stone Age, а претходно и на албумите на Mad Season, супербендот од Сиетел од средината на 90-тите кој беше составен од членови од познатите Alice In Chains, Pearl Jam и Screaming Trees.
Да не ги споменуваме неговите еднократни соработки со музичари како UNKLE, Martina-Topley Bird, Moby, Soulsavers, Melissa Auf der Maur и Creature With The Atom Brain. Сѐ на сѐ, Марк Ланеган учествувал на околу 50 албуми. Педесет години, 50 албуми.
На оваа турнеја го придружуваат и изведувачите Duke Garwood од Англија и Lyenn од Белгија.
Вратите на МКЦ се отвораат во 20 часот, а програмата започнува во 20.45. Билети по цена од 600 денари, само на билетара на МКЦ.
