Меѓународните донатори планираат во април во Киев да одржат конференција на која што би собрале најмалку 15 милијарди американски долари за да може Украина да се спаси од банкрот и да може да се обнови, изјави во понеделникот европскиот комесар за регионална политика, Јоханес Хан.
Донаторите, вклучително Европската унија, САД, Јапонија, Обединетите нации и развојните банки, уште ланскиот јуни се состанаа за да ги договорат начините за помош на Украина, меѓутоа повеќето од нив бараат од актуелните власти во Киев во прв ред да го состават својот сеопфатен список од свои потреби.
Еврокомесарот за регионална политика, Јоханес Хан нагласи во понеделникот дека Украина донаторите треба да ги смета како инвеститори кои сакаат да заработат на вложеното, а истакна и дека украинската влада ветила дека тој план ќе го заврши до средината на февруари, а а тоа би можело да овозможи да се одреди и точниот датум за одржување на донаторската конференција.
„Настојуваме да добиеме сеопфатен план насоки за Украина. Сакаме да поставиме параметри кои може да се проверуваат на тримесечна основа, не сакаме да даваме пари во дупка без дно“, нагласи Хан.
Меѓутоа, Хан нагласи и дека меѓународните донатори меѓусебно треба да го оформат единствениот список со реформи кои што Украина би морала да ги спроведе, доколку сака да да ги добие парите што и се неопходни, наместо секоја поединечна донаторска земја до Меѓународниот монетарен фонд на властите во Киев да им предава сопствен список со барања.
