Шпанскиот министер за финансии, Кристобал Монторо, ја отфрли идејата за било каква „промена на условите“ на грчкиот финансиски пакет, наведувајќи дека и Шпанија почитувала слични мерки за штедење кои и ги наметнале меѓународните кредитори.
„Придружувањето кон Европа е доброволно и ние му припаѓаме на тој клуб под услови да ги почитуваме правилата на клубот, бидејќи тоа е во интерес на сите. Европа не е Европската комисија, ниту Европската централна банка. Ние сме Европа – односно државите кои ја сочинуваат – и ние сме единствените кои ги поставуваат правилата“, изјави Монторо на шпанската државна телевизија TVE, пренеусва агенцијата Франс прес.
Монторо и порача на Грција дека мора да ги почитува реформите и условите кои ги договорила со меѓународните кредитори, и додаде дека во услови на економски потешкотии на новите влади исклучително лесно им е да ја зграбат власта со ветување за зголемување на потрошувачката.
„Сите ние би сакале да владееме на тој начин. Но прашањето е од каде ќе дојдат тие пари? Од Грците? Од останатите Европејци? Кој ќе ги обезбеди тие пари? Тоа е вистинското прашање“, изјави тој.
Заслугите за враќањето на патеката на позитивниот економски раст по шестгодишната рецесија, владеачката конзервативна влада во Мадрид им ги препишува на програмите за штедење. Меѓутоа, и покрај закрепнувањето на економските активности, стапката на невработеност во Шпанија остана на високите 23,7 проценти.
