Швајцарската економија би можела во текот на оваа година да падне во краткотрајна рецесија поради зголемувањето на курсот на франкот предизвикано од одлуката на Централната швајцарска банка да се откаже од врзувањето на националната валута за еврото, но и поради падот на цените на нафтата, соопшти Институтот за економски истражувања KOF.
Институтот ја намали својата прогноза за економските активности на земјата во 2015 година на минус 0,5 проценти, додека во претходната прогноза, објавена во декември, тој се надеваше на економски раст од 1,9 проценти за тековната година.
За наредната 2016 година KOF предвидува нула раст на БДП, за разлика од 2,1 проценти од декемвриската прогноза, пренеусва Ројтерс.
KOF предвидува и кратка рецесија во текот на летото, што ќе предизвика пад на БДП на нивото на цела година од 0,5 проценти, се додава во соопштението.
Според предвидувањата на експертите од овој институт, стапката на невработеност во 2015 година ќе се зголеми на 3,4 проценти од работоспособното население, и на 4,1 проценти во 2016 година, додека во минатата година таа изнесуваше 3,2 проценти.
Потрошувачките цени ќе се намалат за 1,5 проценти во тековната година, додека во претходните прогнози се сметаше на стапка на дефлација од 0,1 проценти.
Што се однесува на извозот, може да се очекува пад од 1,4 проценти во 2015 година, додаваат од KOF.
Истиот извор потсетува дека на почетокот на јануари швајцарската Централна банка објави дека ја напушта политиката за фиксирање на домашата валута на вредност од 1,20 франци за евро, што предизвика скок на курсот и стравувања кај извозниците.
