Новиот стилски правец на италијанскиот производител ќе биде откриен на 24-јуни, кога „Alfa Romeo“ ќе и ја прикаже на јавноста лимузината од средна класа, која во гамата ќе го замени моделот „159“, соопшти извршниот директор Харалд Вестер на авто-саемот во Детроит.
Од компанијата се уште нема официјална потврда дека новиот модел ќе го добие името „Giulia“, како што подолго време се шпекулираше.
Според зборовите на шефот на „FIAT“, Серџо Маркионе, сериозно се разгледува и на тоа име, со оглед дека „Giulia“ претставува значајно име во историјата на „Alfa Romeо“. Тој додаде дека новата „Alfa“ ќе биде важен играч во сегментот на премиум лимузините од средна класа.
„Autonews“ пренесува дека е во план и спортска верзија како ривал на моделите, како што е „BMW M3“, a зa погон ќе се користи модифициран „V6“ турбо-бензинец од моделите „Maserati Ghibli“ и „Quattroporte“ кој би развивал околу 480 ks.
Mаркионе претходно објави дека имаат амбициозен план според кој до 2018-та годишната продажба на „Alfa Romeo“ ќе достигне 400.000 возила, од кои 150.000 би биле пласирани во САД.
