Чешкиот производител објави нови фотографии од третата генерација на „Fabiа“ караван која наскоро ќе пристигне во европските продажни салони.
Новата „Škoda Fabia Combi“ имаше премиера на авто-саемот во Париз, на почетокот на октомври 2014-та, а автомобилот ќе започне да се продава во одредени земји во Европа веќе во текот на јануари.
Покрај новиот дизајн, кој главно е превземен од хечбек верзија, караванот има за 25 l поголем багажник од претходната генерација.
Со исправени задни седишта, просторот на багажникот изнесува 530 l, a со навалување на истите тој може да се зголеми до 1.395 l.
Во споредба со хечбекот, багажникот на караванот е поголем за 200 l, што може да биде пресудно за купувачите на кои капацитетот на багажникот им е важен при купувањето на нов автомобил.
„Škoda Fabia Combi“ од претходникот е подолг за 10 mm, поширок за 90 mm, но и понизок за 31 mm.
Новиот караван воедно е и полесен од стариот и до 55 kg, во зависност од изборот на моторот и пакетот на опрема.
Во понудата ќе бидат четири бензинци и три дизели.
Бензинските мотори произведуваат меѓу 75 ks и 110 ks, додека дизел единиците имаат опсег на моќта од 75 дo 105 „коњи“. Моќта се пренесува на тркалата со помош на мануелниот или „DSG“ менувач со двојно квачило.
Во „Škodа“ велат дека новите мотори се поекономични и до 17% во однос на претходната генерација, и истакнуваат дека најефикасна е „Fabia Combi Greenline“ која има фабрички декларирана просечна потрошувачка од 3,1 l/100 km и емисија на „CO2“ од 82 g/km.
