Централната банка на Швајцарија соопшти дека се откажува од тригодишните напори вредноста на франкот вештачки да се одржи на ниско ниво.
Како резултат на тоа, швајцарскиот франк зајакна за 29 проценти во однос на еврото.
Само неколку минути по соопштението на банката дека ја укинува границата која спречува еврото да падне под 1,2 франци, швајцарската валута зајакна на 0,8517 за евро, пренесува агенцијата Франс прес.
Националната банка на Швајцарија соопшти дека мерката која ја воведе во септември 2011 година со цел да ја заштити швајцарската економија од сериозни ризици поради европската должничка криза повеќе не е оправдана.
Силниот франк особено е проблематичен за швајцарските извозници, кои мораа драстично да ги намалат цените за да останат конкурентни.
Банката исто така порача дека ќе ја намали просечната каматна стапка на минус 0,75 од минус 0,25 проценти.
Акциите на швајцарските берзи потонаа за 6,66 проценти по вестите дека курсот на франкот повеќе не е врзан за еврото.
