Иако за себе сакаат да мислат како за големи работници, најновото истражување покажува дека работохолиците всушност не се продуктивни работници, а и често се разболуваат.
Работохоличарството на некој начин е знак дека личноста не се грижи доволно за себеси, а оној кој се занемарува себе и своето здравје, тешко дека може да биде квалитетен и продуктивен работник. Работохоличарството, покажуваат резултатите на најновото истражување, може да биде многу штетно и најчесто не доведува до успешни деловни резултати.
„Живееме во општество кое промовира работохоличарство. Се доживува како тешка работа која треба да се вреднува и која и користи на секоја компанија. Но нашите резултати покажуваат дека таквите луѓе не постигнуваат некои посебно добри резултати. Она што е уште поважо е фактот дека работохоличарството ја уништува личноста, таа е под стрес, склона на конфликти, иманарушено психичко здравје, а често тоа се одразува и на физичкото здравје“, истакна Малиса Кларк, лидер на истражувањето чии резултати се објавени во магазинот „Journal of Management“.
Експертите откриле дека не постои никаква поврзаност меѓу работохолиците и зголемената ефикасност и подобрата заработувачка. Наместо тоа, воочена е поврзаност со перфекционизмот, особина на личноста која може да предизвика бројни проблеми. Посветеноста на работата, велат експертите, е добра и позитивна работа, но работохоличарството воопшто не е корисно и луѓето треба конечно да го сфатат тоа.