Во Италија започна голем штрајк против политиката на Владата на премиерот Матео Ренци, организинран на повик на најголемиот синдикат во земјата, јави ТАСС.
Генералниот штрајк ги засега приватниот и државниот сектор, како и сите сфери на транспорт, вклучително железничкиот, авионскиот и поморскиот.
Први почнаа да штрајкуваат железничарите, а од 10 часот по локално време се очекува кон штрајкот да се вклучат и вработените од авионскиот сообраќај.
Штрајкот ќе ги засегне жителите на сите италијански градови. Градскиот транспорт ќе запре на осум часа. Во голем број градови штрајкот ќе биде проследен и со протести, а најголемите се очекуваат во Рим и Торино.
Протестот има за цел измени на новиот закон за реформа на пазарот на труд и измени на буџетот, што е неодамна одобрен од парламентот. Штрајкот, исто така, има за цел и гарантирано право на работа и достојни плати.
Организатор на протестот е најголемиот синдикат во земјата Заедничка италијанска конфедерација на трудот (ЦГИЛ), каде членуваат околу шест милиони работници. Штрајкот е поддржан и од Италијанскиот сојуз на труд (УИЛ), каде членуваат околу 2,2 милиони работници.