Конкуренцијата во сегментот на суперлуксузни лимузини не е голема. Во врвот се осамени „Rolls-Royce“ и „Bentley“, a донеодамна за место во клубот на привилегирани се бореше и „Maybach“, како бренд во сопственост на „Daimler“.
Германската компанија од 2013-та се откажа од производството на „Maybach“ како посебна луксузна марка, но беше заклучено дека името „Maybach“ може да послужи за посебна, престижна серија на моделите на „Mercedes“.
Првиот „Mercedes“ модел кој во името ја има ознаката „Maybach“ e новата продолжена лимузина „S-Сlasѕ“, која истовремено имаше премиера на саемите во Лос Анџелес и во кинескиот град Гуанџу.
Ако сметате дека врвот во луксузот „Mercedes“ го достигна со стандардната „S-Сlasѕ“, верзијата „Maybach“ ќе ве предомисли.
Овој автомобил е наменет за одбрани клиенти кои без размислување ќе одвојат пари за дополнителен комфор и ексклузивни содржини.
„Mercedes Maybach“ од регуларната „S-Сlasѕ“ е подолг за 200 mm, па така вкупната должина на овој автомобил е 5.453 mm, a меѓуосовинското растојание дури 3.365 mm.
Благодарејќи на дополнителните сантиметри, пристапот и просторот на задните седишта е на ниво на најлуксузните „Rolls-Royce“ и „Bentley“ модели.
Покрај тоа што од „S-Сlasѕ“ се разликува по должината, „Maybach“ верзијата има и други стилски специфичности, како што е дополнителниот мал прозор сместен во „C“ столбот, на кој се наоѓа и амблемот на „Maybach“.
Патниците на задните седишта добија дополнителен простор за нозете, по што „Mercedes Maybach S-Сlasѕ“ може да се споредува со мал број на сериски произведени лимузини, кои не се дополнително продолжени.
Во „Mercedes“ особено се горди на звучната изолација во кабината и тврдат дека станува збор за „најтивкиот автомобил на светот“, веројатно елиминарајќи ја конкуренцијата на модели со електричен погон.
На купувачите на почетокот ќе им биде понуден најмоќниот модел, „Mercedes Maybach S600“, со 6.0-литарски „V12“ би-турбо мотор кој произведува 530 ks (390 kW) и 830 Nm.
Подоцна во продажба ќе се појави и моделот „S500“, кој има 4.7-литарски „V8“ би-турбо бензинец со 455 ks (335 kW) и 700 Nm.
Понудата на крајот ќе биде завршена и со верзијата „S400 4MATIC“, со „скромен“ 3.0-литарски „V6“ мотор со 333 ks (245 kW) и 480 Nm, чиј адут е погонот на сите четири тркала.
„Mercedes“ соопшти дека продажбата на „Maybach S-Сlasѕ“ ќе започне во февруари 2015-та, додека цената на овој суперлуксузен модел дополнително ќе биде објавена.