Три години по лансирањето на моделот „Q3“, „Audi“ го освежи својот најмал кросовер. Мали промени се забележани и кај спортската „RS Q3“ верзија, која е претставена во 2013-та.
„Audi“ е познат по дискретните промени при редизајнот и претставувањето на новите генерации на своите автомобили, па така дизајнот на моделот „Q3“ е минимално променет.
Променета е маската на ладилникот која има засилена хромирана рамка, редизајниран е предниот браник, како и фаровите кои сега се стандардно опремени со „Xenon Plus“ технологијата и дневни „LED“ светла.
„Audi“ како опција нуди и т.н. „динамички“ покажувачи на правецот, со низа „LED“ светилки кои посетепено се вклучуваат и исклучуваат.
Стилските промени на задниот дел се помалку впечатливи и ги опфаќаат стоп-светлата и долниот дел на браникот.
Покрај козметичките промени, „Audi“ ја подобри и економичноста на погонските единици.
„Audi Q3“ зa 2015-та во понудата ќе има три турбо бензинци „TFSI“ и три турбо дизел „TDI“ агрегати. Од „Audi“ тврдат дека успеале да ја намалат просечната емисија на јаглерод-диоксид за 17 отсто во однос на досегашната палета на мотори.
Погонските единици имаат зафатнина од 1.4 и 2.0 литри, а распонот на моќта се движи од 120 ks дo 220 ks. Сите агрегати ги задоволуваат „Euro 6“ стандардите.
Благодарејќи на технологијата која овозможува деактивација на поединечни цилиндри кога во текот на возењето нема потреба за дополнителна моќ, германскиот производител успеа да постигне значителна заштеда во потрошувачката на гориво на верзиите 1.4 TFSI и 2.0 TDI.
Споменатиот дизел воедно е и најекономичниот во новата гама на „Audi Q3“ со просечна потрошувачка од 4,4 l/100 km.
Во врвот на понудата се наоѓа „Audi RS Q3“, кој исто така има редизајнирана надворешност.
Сепак, за купувачите уште позначаен е неговиот 2.5-литарски петцилиндарски „TFSI“ мотор кој е зајакнат за 30 „коња“ или на 340 ks, додека максималниот вртежен момент е зголемен за 30 Nm и сега изнесува 450 Nm.
Преведено во забрзување, „RS Q3“ со подобрениот седумстепен „S tronic“ менувач од место до „стотка“ стигнува за 4.8 секунди, а претходно за тоа му требаше 5.5 секунди.
„Audi Q3“ ќе пристигне во продажните салони во Европа во февруари, а почетната цена ќе изнесува 29.600 eвра, додека „RS Q3“ ќе чини од 56.600 eвра.