Португалија потфрли во напорите да ја зајакне економијата со помош на структурни реформи, откако во јуни излезе од програмата за меѓународна финансиска помош, соопштија вчера Европската централна банка (ЕЦБ) и Европската комисија (ЕК).
Португалија помина три години низ строги буџетски штедења, на кои се согласи во замена за странска помош, откако се најде во најсериозната економска криза од 1970-тите години, пренесува Ројтерс.
Економијата на Португалија започна да закрепнува во вториот квартал оваа година.
„Напредокот во структурните реформи го загуби замавот, а имплементацијата на мерките не е иста во сите области“, се наведува во заедничкото соопштение на ЕЦБ и ЕК“, чии претставници од 28 октомври до 4 ноември престојуваа во Лисабон поради проценка на реформите.
„Напорите да се намали структурниот буџетски дефицит исто така се намалени, а ризиците кои и се закануваат на краткорочната економска прогноза се поврзани, како со внатрешните, така и со надворешните фактори“, наведуваат институциите.
