Сивата економија, дополнително поттикната од кризата, изнесува околу 23 проценти од бруто домашниот производ (БДП) на Шпанија, што е еквивалент за четири милиони вработени, наведува Заводот за статистика од Мадрид.
Ова е далеку поголем процент отколку во останатите европски земји. Во Германија тој удел изнесува 15 проценти, а во Франција и Холандија по 11 проценти, пренесува АФП.
Шпанската држава годишно губи помеѓу 60 и 80 милијарди евра поради даноците и работата на црно, проценува Националниот завод за статистика.
Покрај тоа, сивата економија создава нелегална конкуренција на легалните претпријатија и ја зголемува нивната неефикасност.
Заработката на црно надминува 11 проценти од БДП, а бројот на лица кои работат непријавено се движи околу 1,85 милиони.
Тоа е поголем процент отколку во Германија, каде тој изнесува 7,9 проценти, во Франција 6,9 проценти и во Холандија 4,2 проценти.
Најмногу работат на црно лицата кои останале без работа, како и младите од 15 до 34 години.
