Грчката влада денес соопшти дека работи на план на граѓаните кои подигнале хипотекарни кредити да им се овозможи отплата со намалени каматни стапки на период од 15 години.
Официјална Атина се одлучи на ваков чекор во рамките на широките напори да се намали бројот на ненаплатливи кредити и пазарот за недвижнини да закрепне од остриот пад на цените до кој дојде за време на шестгодишната рецесија.
Министерот за развој Никос Дендијас изјави дека владата очекува дека наредниот месец ќе се финализира планот, кој на корисниците на хипотекарни кредити ќе им даде право да ја замрзнат отплатата на 30 проценти од кредитот, пренесува агенцијата Франс прес.
Дендијас наведува дека владата е во преговори со банките за предложениот план. Министерот додаде дека владата му го предала на парламентот предлог-законот за кредитните олеснувања за малите компании кои се тешко погодени со мерките за штедење, со кои официјална Атина мораше да се согласи во замена за меѓународна помош.
