Холандската банкарска групација „Rabobank“ ќе биде казнета со повеќе од 440 милиони долари поради манипулирање со каматната стапка Либор, извести новинската агенција Блумберг.
„Rabobank“ е втората финансиска групација во Холандија гледано според вредноста на билансот, а цитирајќи извори блиски на истрагата, Блумберг соопштува дека оваа банка може да постигне договор со американските и британските регулатори околу обвинението за манипулирањето со Либор.
Лондонската меѓубанкарска каматна стапка Либор и европската каматна стапка Еурибор се клучни индикатори за цената на задолжување на банките.
„Rabobank“ најверојатно ќе плати помеѓу 290 милиони фунти (438 милиони долари) и 612 милиони долари. Казната може да биде наплатена во мај.
Холандската банка во корпоративна сопственост одби да ја коментира оваа информација. Таа во август објави дека примила неколку судски покани и барања за информации од процесот со утврување на референтната каматна стапка во различни земји, вклучувајќи ги и Велика Британија, САД, Швајцарија, Јапонија и Сингапур.