Весникот „International Herald Tribune“, кој е еден од најдолготрајните брендови во историјата на новинарството, наскоро ќе се преименува во „International New York Times“.
Одлуката за промена на името е дел од напорите на медиумската група „New York Times“ да го прошири присуството на весникот надвор од границите. Новото име ќе почне да се користи во текот на оваа година, а весникот планира да ангажира уште коментатори и репортери.
Генералниот директор Марк Томпсон, во писмена изјава истакна дека анализата извршена од страна на компанијата покажала потенцијал за зголемување на читателите и надвор од САД.
Медиумската групација „New York Times“, која е сопственик на весниците „New York Times“ и „International Herald Tribune“, што се издава во Париз, во последниот квартал од минатата година оствари приход од 468 милиони долари, што е шест отсто повеќе отколку во истиот период од 2011 година.
Минатата недела холдингот соопшти дека ќе го продаде весникот „Boston Globe“, со цел повеќе да се посвети на брендот „New York Times“.
