Во организација на Народната банка на Република Македонија, денеска и утре во Скопје, ќе се одржи третата годишна регионална средба на Меѓународната организација за финансиска едукација на деца и млади за Европа и Централна Азија (ЕЦА).
Целта на средбата е да се зајакне и да се усогласи финансиската вклученост, економската едукација и иницијативите за претприемаштво за младите во регионот.
На средбата ќе присуствуваат водечки носители на политиките од регионот, финансиски институции, експерти, практичари и иноватори коишто се занимаваат со прашањата поврзани со пристапот на децата и на младите до финансиите, финансиската вклученост и финансиската едукација, можностите за вработување и претприемаштвото и ќе споделат успешни приказни и предизвици.
Вкупно 65 деца и млади од цела Европа и Централна Азија ќе ги претстават пред носителите на политиките своите точки на дејствување за создавање соодветни и одржливи економски можности за младите.
