Во зависност од тоа чија класификација се гледа, Бил Гејтс е најбогат или вториот најбогат човек во светот.
Според „Форбс“, Гејтс има 82 милијарди долари и е број 2 во светот, а на првo место е мексиканскиот магнат Карлос Слим (85.4 милијарди долари). Според „Bloomberg“, сепак, Гејтс се уште е број 1 со 86.5 милијарди долари. Всушност, никој не знае точно колку пари има Бил Гејтс, благодарение на неговиот менаџер Мајкл Ларсон, кој ги држи сите во голема тајност.
Ларсон управува со инвестициската фирма на Гејтс, „Cascade Investment LLC“. „Cascade“ е приватна компанија и јавно не ги објавува финансиските резултати. Ларсон користи и секакви потфати за да се скрие учеството на Гејтс во инвестициската компанија, како и инвестициите во имотните холдинзи.
Од она што може да се трага, сепак излегува дека Гејтс денеска е со најмалку 6 милијарди долари побогат, отколку од пред 6 месеци. Во март 2013-та година „Форбс“ посочи дека Гејтс располага со 67 милијарди долари, а во март 2014-та година тие посочија со 9 милијарди долари повеќе.
Податоците на „Bloomberg“ покажуваат дека богатството му се зголемило со над 10 милијарди долари. Но, во едно сите се согласуваат – богатството на Гејтс расте, а интересно е дека изворот не е „Microsoft“.
Кога „Microsoft“ стана јавна компанија во 1986-та година, Гејтс имаше 45% удел во неа, или 1 милијарда акции. Од 1994-та до сега тој го има распродадено поголемиот дел од овој удел.
Денес парите на Гејтс доаѓаат од „Cascade“. Јавно достапните документи на „Cascade“ не се многу. Но се знае дека тој има удели во „Canadian National Railway“, „AutoNation Inc.“, „Berkshire Hathaway“ и „Republic Services Inc.“.
Пред некое време Гејтс имал солидни удели во „Deere & Co“, „Liberty Global“ и „Waste Management“. Гејтс има удели во некои големи хотели како „Charles Hotel“ во Кембриџ, Масачусетс, „Ritz-Carlton“ во Сан Франциско и „Four Seasons Holding“. Тој има и ранч од 490 хектари во Вајоминг.
Инвестициите во технологија се малку. Во 1989-та година тој го основа „Corbis“. Има удел во „TerraPower LLC“, компанијата за замена на месо „Beyond Meat“ и „ResearchGate“. Во „Microsoft“, Гејтс има 300 милиони акции.
Доколку тој ги имаше задржано сите свои акции во „Microsoft“, денес тој неприкосновено ќе беше најбогат човек во светот. Денес акциите на компанијата се тргуват над 47.59 долари, при пазарна капитализација од 385 милијарди долари. Процентот од 45% на Гејтс денес би се оценил на 173 милијарди долари – сума, каква нема ниту еден човек во светот.
