Јапонската корпорација „Toshiba“ најави дека до крајот на оваа фискална година ќе заврши со реструктуирањето на својот оддел за производство на персонални компјутери. Како дел од тој процес, како најважна се истакна потребата за намалување на оперативните трошоци, што со себе неизбежно повлекува и отпуштање на вработените. Според најавите од компанијата до крајот на фикалната година (која завршува во март 2015 година) од овој оддел ќе бидат отпуштени 900 вработени.
Освен отказите, најавено е и повлекување од бизнисот ориентиран на крајните потрошувачи во некои региони. Последица од сите овие промени би требало да биде заштедата од околу 180 милиони американски долари на фиксните трошоци, но и намалувањето на оперативната добивка за оваа година во износ од околу 415 милиони долари. Проекцијата за годишната добивка останува непроменета.
