Претседателката на американската Банка на федерални резерви (ФЕД), Џенет Јелен, изјави дека Европа сеуште претставува „опасност“ за светската економија.
Економијата на Европа е еден од ризиците за глобалната економија, изјави шефицата на ФЕД на конференцијата за новинари во Вашингтон.
Јелен особено ја посочи „премногу ниската инфлација“ и „слабиот“ економски раст во Европската унија која се бори да закрепне од должничката криза од 2010 – 2011 година.
Во вториот квартал, бруто домашниот производ (БДП) во еврозоната стагнираше по срамежливото зголемување од 0,2 проценти во претходниот квартал.
Со цел да се поттикнат економските активности и да се спречат заканите од дефлација, Европската централна банка (ЕЦБ) на почетокот на септември уште еднаш ја намали каматната стапка и најави програма за откуп на финансиски производи од должничките хартии од вредност (ABS).
„Ние очигледно се надеваме дека тие ќе успеат да го поттикнат економскиот раст и инфлацијата“, изјави Јелен, додавајќи дека тоа би било „добра работа“ за економијата во светот и за САД.