Во Тетово вчера беше отворен Инфо Поинт Центар, кој ќе функционира како дел од проектот „Заштита на трговската марка на производите од прекуграничната соработка“ за прекугранична соработка меѓу Македонија и Албанија, во рамки на Програмата ИПА 2007-2013, финансирана од Европската Унија.
На свеченото отворање учествуваа претставници од компаниите членки на Стопанската комора на северозападна Македонија (СКСЗМ), невладини организации, универзитети, градоначалничката на општина Тетово Теута Арифи, како и претставници од Делегацијата на ЕУ во Скопје.
Овој проект се реализира во полошкиот и југозападниот регион на Македонија и ќе бидат опфатени градовите Тетово, Гостивар, Дебар, Кичево, Струга и Охрид, а од страна на Албанија, градовите Корча и Дибра. Проектот започна да се имплементира на 2 јуни 2014 година, и ќе трае до 2 декември 2015 година.
Претседателот на СКСЗМ Мендерес Кучи истакна дека дамнешна идеја на Комората е започнување иницијатива за подигнување на свеста на компаниите за заштита на трговските марки и производите на начин што почетната инвестиција и регистрацијата на марката во голема мера подоцна ќе им помогне да не се злоупотреби нивното име или марка, која, како што рече, може да ги чини многу, па дури и до губење на имиџот на производот.
Градоначалничката на општина Тетово, Арифи, посочи дека Македонија има многу производи, и оти единствена работа која треба да се направи е да се подигне знаењето на компаниите за заштита на нивните трговски марки.
„Се надеваме дека овој Проект ќе има влијание врз компаниите за нивно освестување од аспект на заштита на трговските марки и производите“, рече Теута Арифи.
