Темпото на раст на производствената активност во еврозоната забави во август на 13-месечен минимум, покажуваат податоците на лондонската компанија Маркит.
Индексот на управување со набавките (ПМИ) за производствениот сектор на еврозоната, кој го пресметува истражувачката компанија Маркит, се намали во август на 50,7 поени од 51,8 поени забележани во јули. Резултатите над 50 поени укажуваат на јакнење на секторските активности, а оние под 50 поени на нивно слабеење.
„Како резултат на растечките тензии во односите меѓу Европската унија и Русија поради украинската криза, регистриран е пад на новите нарачки и послаба активност во фабриките на еврозоната“, се наведува во соопштението на Маркит.
ПМИ за Германија, која е најголемиот трговски партнер на Русија, во август се намали на 11-месечен минимум од 51,4 поени, додека ПМИ во Франција, втората најголема економија во еврозоната, се намали на 46,9 поени.
Единствените позитивни податоци се забележани во Ирска, во која ПМИ во август пораснал на 57,3 поени, што е највисокото ниво од крајот на 1999 година.
