Јужноафриканската Република во првата половина од годината избегна рецесија благодарение на економскиот раст од 0,6 проценти во вториот квартал.
Најразвиената африканска економија во првиот квартал оваа година евидентираше пад на БДП од 0,6 проценти, најмногу поради штрајковите во рударскиот сектор, пренесува агенцијата Франс прес.
За раст на економијата во вториот квартал придонесе зголемувањето на јавната потрошувачка и мајските избори. Поголемиот раст, сепак, беше спречен со петмесечните штрајкови во секторот за ископување платина.
Преработувачкиот сектор, исто така, негативно влијаел на економскиот раст, особено во областа за производство на мотори, како и транспортната, хемиската и нафтената индустрија. Сепак, избегнатата рецесија е добра вест за економијата која е оптоварена со висока невработеност, инфлација и голема сиромаштија и нееднаквост.