Проектот на УСАИД за експанзија на мали бизниси денеска на поле во село Горно Оризари ќе ги презентира иницијалните резултати од првото поле со сончоглед во Македонија наводнувано со систем капка по капка.
Системот капка по капка беше поставен на опитното поле во јуни оваа година со донација од Проектот на УСАИД за експанзија на мали бизниси. На полето од еден хектар се очекуваат приноси од околу 5 тони, четири пати повеќе од националниот просечен принос од 1,2 тони по хектар. Квалитетот на сончогледот е, исто така, значително подобрен во споредба со насадите кои не се наводнуваат, а со тоа се гарантираат и повеќе од двојно поголема откупна цена.
На презентацијата ќе присуствуваат одгледувачи на сончоглед од вардарскиот, североисточниот, полошкиот и пелагонискиот регион кои се заинтересирани за користење на системот капка по капка на нивните посеви.
Како што информира организаторот, за Македонија да ги задоволи своите потреби и да го замени увозот на сончоглед со домашно производство, доволно е просечните приноси да се зголемат за само 70 отсто, од 1,2 тони по хектар на 2,1 тони по хектар. Системот капка по капка е ценовно најефикасниот начин за зголемување на приносите затоа што драстичното подобрениот квалитет и квантитет дозволуваат системот да се отплати за само една сезона.
